తెలుగు రాష్ట్రాలలో ఒకటైన ఆంధ్రప్రదేశ్ ఎంతో ఘనచరిత్ర కలిగిన రాష్ట్రం. భాషాప్రయుక్త రాష్ట్రాల ఏర్పాటులో భాగంగా 1956లో ఆంధ్ర, రాయలసీమ, తెలంగాణ ప్రాంతాలు కలిసి ఆంధ్రప్రదేశ్‌ పేరిట ఉమ్మడి రాష్ట్రంగా ఏర్పడ్డాయి. తెలంగాణ వీడిపోవడంతో ఆంధ్ర, రాయలసీమ ప్రాంతాలు ఇప్పుడు ఆంధ్రప్రదేశ్‌ రాష్ట్రంగా కొనసాగుతున్నాయి. ఆంధ్రప్రదేశ్‌లో ప్రధాన భాష తెలుగు కాగా.. ఉర్దూ రెండోస్థానంలో ఉంది. రాష్ట్రానికి వాయవ్య దిశలో తెలంగాణ, ఉత్తరాన ఛత్తీస్‌గఢ్, ఒడిశా రాష్ట్రాలు, తూర్పున బంగాళాఖాతం, దక్షిణాన తమిళనాడు, పడమరన కర్ణాటక రాష్ట్రాలు ఉన్నాయి. భారతదేశంలో ఎనిమిదో అతి పెద్ద రాష్ట్రమైన ఏపీలో ముఖ్యమైన నదులు గోదావరి, కృష్ణ, తుంగభద్ర, పెన్నా. 1953 అక్టోబర్‌ 1న మద్రాస్ రాష్ట్రంలోని తెలుగు మాట్లాడేవారు ఎక్కువగా ఉన్న ఆంధ్ర, రాయలసీమ దత్త జిల్లాలను కలిపి ఆంధ్రరాష్ట్రం ఆవిర్భవించింది. రాష్ట్రాల పునర్విభజన బిల్లు ఆమోదం పొందాక భాషా ప్రయుక్త రాష్ట్రాలు వచ్చాయి. దీంతో 1956, నవంబర్‌ 1న అప్పటి హైదరాబాద్ రాష్ట్రంలోని తెలంగాణ ప్రాంతం, మద్రాస్ నుండి వేరుపడ్డ ఆంధ్ర రాష్ట్రం కలిపి హైదరాబాద్ రాజధానిగా ఆంధ్ర ప్రదేశ్ ఏర్పడింది. అడపాదడపా సాగిన ప్రత్యేక రాష్ట్ర ఉద్యమాల ఫలితంగా దాదాపు 58 సంవత్సరాల తరువాత 2014 జూన్ 2న రాష్ట్రం పునర్విభజింపబడి.. నవ్యాంధ్రప్రదేశ్, తెలంగాణ అనే రెండు తెలుగు రాష్ట్రాలుగా 2014 జూన్ 2 నుంచి అమలులోకి వచ్చాయి. 

నవ్యాంధ్రప్రదేశ్‌ నూతన రాజధాని అమరావతి కాగా రాష్ట్రంలో మొత్తం 13 జిల్లాలు ఉన్నాయి. అవి శ్రీకాకుళం, విజయనగరం, విశాఖపట్నం, తూర్పు గోదావరి, పశ్చిమ గోదావరి, కృష్ణా, గుంటూరు, ప్రకాశం, శ్రీ పొట్టి శ్రీరాములు నెల్లూరు, వైఎస్సార్‌, కర్నూలు, అనంతపురం, చిత్తూరు జిల్లాలు. అపారమైన వనరులు, సువిశాలమైన సముద్ర తీరప్రాంతంతోపాటు వ్యవసాయం ప్రధాన వృత్తిగా కొనసాగుతున్న ఆంధ్రప్రదేశ్‌ రాష్ట్రంలో తిరుమల తిరుపతి దేవస్థానం, శ్రీశైలం, దాక్షరామం, అన్నవరం, బెజవాడ కనకదుర్గమ్మ వంటి ప్రముఖ పుణ్యక్షేత్రాలు, అరుకు లోయ, హార్స్‌లీ హిల్స్‌ వంటి పర్యాటక ప్రాంతాలు ఉన్నాయి. 2014లో జరిగిన రాష్ట్ర తొలి అసెంబ్లీ ఎన్నికల్లో తెలుగుదేశం పార్టీ 102, వైఎస్సార్‌ కాంగ్రెస్‌ పార్టీ 67 స్థానాలు, బీజేపీ నాలుగు స్థానాలు, ఇండిపెండెంట్‌ అభ్యర్థి ఒక స్థానంలో విజయం సాధించారు. చంద్రబాబునాయుడు నేతృత్వంలో తెలుగుదేశం పార్టీ ప్రభుత్వాన్ని ఏర్పాటు చేసింది. గడిచిన ఐదేళ్ల కాలంలో టీడీపీ సర్కారు పాలనతో విసిగిపోయిన రాష్ట్ర ప్రజలు ఏపీలో మార్పు కోసం ఎదురుచూస్తున్నారని, ప్రతిపక్ష వైఎస్సార్‌సీపీకి అధికారం కట్టబెట్టనున్నారని తాజా సర్వేలు చాటుతున్నాయి.